Babies G滿月啦！附簡易紅雞蛋做法～

今年冬至好特別，
因為都係babies G滿月既大日子。
不知不覺我都做左孖媽一個月啦！
開始習慣呢個身份，照顧兩個BBs真係好忙，
每日無限loop餵奶掃風換片泵奶～
好彩有婆婆同老公幫手
呢刻希望佢地快d戒夜奶，等大家夜晚有覺好訓！
二重唱既夜晚真係好易令人發癲hahaa~~~

 

滿月有個「洗蘇」儀式...
寓意大個仔大個女，冇左蘇蝦味～
先用碌柚葉煲水，再加上蔥&芹菜幫bb沖涼！
咁就身體健康，聰明伶俐，勤勤力力啦！

 
 而滿月大日子我地都有按傳統向親戚朋友派紅雞蛋，攞返個好意頭。

傳統既紅雞蛋係用花紅粉染色，
不過食完隻手紅當當，好鬼難洗！
今次，我就用個新方法整紅雞蛋，
既保持傳統，又唔會整污糟手，而且重簡單方便添，
秘密就係用紅色既勞作玻璃紙喇！

 
將烚好既雞蛋，攤凍之後用紅色玻璃紙包好，
再用金色既包裝鐵線扭實，就包到靚靚既紅雞蛋喇！

收到既親友都大讚呢種紅雞蛋又靚又有心思，
希望大家下次滿月或小朋友生日派紅雞蛋，都試下呢個方法！

最後happy share龍鳳b個滿月蛋糕，好靚又好味！
 

facebook page : 龍鳳Babies G & 孖媽Gloria
邀稿/合作: twins.babiesg@gmail.com