「媽媽日誌」 - 全職爸媽小挑戰！

上星期對我同老公黎講算係一個小挑戰！
因為公公婆婆去旅行呀！
亦由於假期關係，我同老公都唔可以一齊連請5日二湊二，
變左要各自一湊二！
我同老公每人3日假，各自湊兩日，再一齊湊1日!!

老公好叻~~~~嫲嫲黎左幫手半日，之後佢都係一個湊等我放工!
仲要湊B期間抽時間做家務…吸塵拖地收衫掠衫~~超厲害~~~

我湊兩日就搵左朋友&babies G姨婆黎幫手!!
因為佢地好多時趁我泵奶就喊…
就令我好論盡…而且有人陪我吹下水時間易過好多~~

同老公一齊湊孖b，當然唔放過同佢地出下街啦~~
本身天文台話落雨，但好好彩當日出太陽!!
我地二湊二去左荃灣食lunch打邊爐~~

 

朋友介紹既台式火鍋「養生殿」，
平日7:30前埋單仲有半價
湯底揀左養生鍋拼 美人鍋
好甜呀！養生鍋有人參，金華火腿而煮成，
配料仲有鴨血、凍豆腐！
而美人鍋有半隻烏雞，桃膠等...
真係要飲多兩碗～

 

 
配料揀左手切肥牛、
黑毛豬、手打丸、墨魚滑、黑柏葉！
質素好好，樣樣都好味！

而且下午唔多人，好舒服咁嘆左個邊爐...
兩兄妹仲輪流覺覺豬..
俾爸爸媽媽嘆下
 

如果正價食真係有點貴，半價後還可以...
但久不久輕鬆出街食下都不錯
之後仲食埋soffule pancake!!

 
 
今次仲好叻叻，同爸爸兩個搭巴士出入~~
真係要好多謝Babies G咁合作…haha

----------------------------------------------------------------------------------------
facebook page : 龍鳳Babies G & 孖媽Gloria
邀稿/合作: twins.babiesg@gmail.com