男士侍產假幾多先至夠?

 

最近男士侍產假話題鬧得熱哄哄~~
對比法例規定媽媽既10週產假，爸爸得3日…又真係太少!!
其實媽媽10週我個人覺得都唔多夠~
不過都係講返爸爸先~~

究竟BB出世後，爸爸3日侍產假要分配做D咩?
*Bb出世當日去陪產，迎接BB出世?
*接媽媽同BB出院?
*出院後第二日去健康院檢查?
*同BB拎出世紙?

其實正常順利順產媽媽，
都要住醫院3日2夜，剖腹生產最少都要住4日3夜。
咁得3日假，爸爸點算?

如果BB唔好彩，有黃疸要成日返健康院檢查/醫院照燈，
真係有機會幾日又出去一次，爸爸又點算?
又唔好彩，BB唔夠重出世要留院訓箱，爸爸又點算?

可能D大人會話，有媽媽嘛，而家又陪月又工人，實搞得掂既~~
但其實男人呀….你先係BB個爸爸，老婆既另一半!!產婦生產後已經需要好好坐月休息，
而且產後情緒不穩，媽媽係好需要老公既支持同陪伴!

再者，媽媽懷胎十月同BB心連心，母性自懷孕起就已經培養出黎。
但男人做爸爸既覺悟呢? 好多時都係BB出世後，有「實物」係面前，
先真正感受到做左爸爸!!負擔重左，責任重大呢~~

好好彩，babies G既爸爸自孖媽入院當日，
放左3星期「侍產假」(由侍產假+大假+例假安排而成)
而老公做爸爸既覺悟，亦都好快迫左出黎XDD”~~~

住院期間每日兩轉探病時間，
佢都會由沙田出QE拎飯拎代茶俾我~~
探BB陪我傾下計，lunch後佢又拎返D暖杯暖壺返屋企俾婆婆，預備晚飯俾我。

另外仲要砌BB床 (婆婆要求入左院先可以砌)，
再清潔執拾好屋企迎接BBS~~
每日兩轉其實都累….

終於出院回家，婆婆係我家訓過夜幫我坐月，
初生BBS食奶比較密，半夜要食兩轉奶，
老公&婆婆就每人負責一更 (孖媽我被要求要訓覺休息)，
老公多數負責清晨4-5點個轉，
佢一個人落床餵晒兩個bb再返上床訓(孖媽都唔知XD”)，
真係好厲害!!!

 

對於未湊過BB既老公，餵奶換片幫bbs沖涼著衫，
佢好快就上晒手…仲可以一湊二，等我同婆婆休息!!

3個星期時間佢完全well trained去湊BBs。
湊一個BB都唔容易，我地仲有2個BB~~~

如果唔係有幾個星期去學習當新手爸爸，
我相信老公都冇可能做得咁好。
亦因為有老公同婆婆照顧我地，
我坐月先可以坐得咁好!!

真係好感恩，老公好主動去學習，
自知責任重大，成日寧願訓少D都要湊好BBs，
當然亦硬食好多我既臭脾氣hahaha~~~

所以我絕對贊成政府應該增加男士侍產假同女士產假架!!

雖然我冇機會再享受~~hahaha

----------------------------------------------------------------------------------------
facebook page : 龍鳳Babies G & 孖媽Gloria
邀稿/合作: twins.babiesg@gmail.com