［長文］哥哥的小腸氣手術

倒帶回到今年的農曆新年，妹妹唔舒服，有發燒同咳咳，
帶左妹妹睇屋企附近的家庭醫生，有好轉，可惜仍然有咳咳。

係屋企已經盡量分開兩個BB，但哥哥仍然都被傳染…
始終BBs只有3個月大，
所以公公就建議出佐敦去睇孖媽由細睇到大的兒科醫生。

睇醫生的前一晚，爸爸幫哥哥換片時，發覺人魚線位附近脹左…
都唔知咩事，但一陣間再睇就平復返。

到第二日，兩兄妹出佐敦睇醫生，那位醫生係兒科界都頗有名氣，
所以孖媽要門都未開就衝出去係大堂排隊，夠鐘再衝上去掛號。
之後再請公公婆婆帶babies G出黎。

知道呢個醫生嗎?haha~睇醫生都要影張相XDD"

 

本打算睇下兩兄妹既咳咳，
咁就順便問埋醫生哥哥脹左既問題…

經驗老到既醫生摸兩摸再檢查下…
就說明: 哥哥有腹股溝小腸氣~~要做手術!!!
晴天pigpig既孖媽完全呆晒，空白一遍…點解?點解?

出左醫生房…忍唔住….哭了

「在小兒外科手術中，小腸氣是其中一個常見的疾病，兒童身上較普遍的是腹股溝疝氣(即小腸氣)，一出生時腹壁已有缺口。兒童小腸氣的形成，要追溯至胎兒尚在母體的階段；在28周時，男性胎兒的睾丸由腹腔進入陰囊，必須經過一條名為腹膜鞘狀突（Processus vaginalis peritonei，又名疝氣袋）的管道；正常情況下，胎兒出生前管道便會關閉，但有些胎兒的管道未有關閉，便可形成疝氣。目前先天形成的小腸氣原因不明，但已知早產兒的發生機率較高，因為他們提早出生，令管道未有足夠時間關閉。亦由於腹股溝孔沒有閉塞，使脂肪、小腸及內臟等物穿越洞孔掉出卡住而造成疼痛。要徹底治療小腸氣，患病的小朋友必須盡早透過手術治療。」

醫生寫了轉介信，立即去醫院排期。
亦解釋只要脹完後會平復，
唔好俾哥哥大喊太谷，暫時都唔算大問題。

 

知道扭計有人抱，哥哥唔乖!!

醫院排期後都要兩個月後先見醫生，
唯有成日抱哥哥，等佢唔好大喊，
有時得自己一個餵緊妹妹，

哥哥又大喊都冇辦法要放低妹妹先~

呢個moment既妹妹又會好似知發生咩事，好乖乖~~

5月頭見完醫生，都係排期做手術。
本身排到10月頭….=.=”
仲有成5個月!!!咁咪要抱多5個月，擔心多5個月…
醫生話如果提早有位會電話通知，但多數一通知就第2日做!
因為係攝期~~好啦!!回家繼續觀察…

5月中某日朝早收到醫院來電，即刻勁緊張!!!!
醫生話有期第2日做呀~要今日下午入院見醫生同麻醉科~~
好彩孖媽工作可以urgent請假!!!
下午請婆婆帶哥哥到醫院，辦入院手續，就上D5兒科病房..

病房好滿呀，走廊都擺滿晒床位，可能哥哥仲細，
有床位，唔使訓走廊…

  哥哥既床位~

下午見完醫生及麻醉科，就可以回家渡假，聽朝7點再返黎做手術
(姑娘話排第3個做，但都要7點返黎等=.=”

政府醫院冇得解，多突發有機會提早做wor)

預計哥哥大約12點麻醉做手術，之前要禁食，
如果飲人奶最後餵係凌晨4點，奶粉就2點，
所以媽媽就較好鬧鐘4點起身餵哥哥飲奶奶~~
7點返到醫院就開始漫長既等待…..

 

未手術前好精靈~~大眼睛XD"

病房好嘈，唯有同哥哥係走廊尾靜靜地抱住佢訓…
又擔心佢肚餓扭計，所以全程用孭帶抱住佢…
哥哥好乖，可能佢都知道預備做手術，
竟然冇扭計大喊食奶奶~~

 

約11:30 姑娘話預備換衫做手術啦!!!

帶埋手術帽都係咁可愛…

 

只可以著醫院衫+片片+帶帽著手術襪~

 

再抱佢落D4 (孖媽開刀生bbs都係D4呀!哈)
約12:20醫生定姑娘係我手中抱走哥哥做手術…
本身已經喊左好多次既孖媽，
今次終於爆發大喊 (姑娘心諗: 使唔使呀XD”)
好似俾人搶左個仔咁….但哥哥咩都唔知仲傻下傻下咁~
喊完，就同老公去pacific coffee食lunch...
之後老公要返工 (請唔到urgent 假)

我就上返D4門口等…
 
2點鐘就收到電話，可以入去觀察病房陪哥哥
岩岩做完手術，姑娘話已經醒返，但喊緊所以會俾媽媽入黎..
入到去，姑娘問我抱唔抱住佢，當然抱啦!!!
攬實實，好彩帶定奶咀，姑娘俾左張暖被我…
就抱住哥哥係觀察病房坐左一個鐘…
  

3點左右就上返D5病房~~但都未可以即刻食奶住…

要睇多陣，唯有用熟水幫佢印下咀仔，怕佢太乾。
病房有提供泵奶既所有設備…
我自備左奶樽，婆婆到左就閃去泵奶先。
泵完即刻餵哥哥，餓奶太耐，好快就chur晒支奶奶~~

  唔夠喉咁XD"~

婆婆係度，孖媽去食個快飯~~
婆婆就返去照顧妹妹啦!!!
孖媽繼續照顧哥哥，
可能麻醉過都有點呆…同唔太算肯食奶~~

 

老公12點放工過黎接更，

陪哥哥通宵，孖媽就飛的回家泵奶休息。

第2朝再7點飛的去睇哥哥，
冇咩事，笑返冇咁呆，又口水佬講下野咁~~
 

見埋醫生冇事就出院lu~~

兩星期後覆診拆膠布，傷口埋得好好,
兩邊既傷口唔覺眼，係肚臍下有個微笑形既傷口明顯少少～
好返冇事可以由你大喊lu~~~yeahyeahyeah!

----------------------------------------------------------------------------------------
facebook page : 龍鳳Babies G & 孖媽Gloria
邀稿/合作: twins.babiesg@gmail.com